Гісторыя міжнародных піяністычных конкурсаў у Беларусі пачынаецца з 1996 года. Першы Міжнародны конкурс музыкантаў-выканаўцаў "Фартэпіяна. Мінск-96" адбыўся восенню 1996 года па рашэнні Міністэрства культуры Рэспублікі Беларусь і пры садзейнічанні спецыяльнага фонду Прэзідэнта Рэспублікі Беларусь па падтрымцы таленавітай моладзі. У конкурсе прынялі ўдзел 82 маладых піяніста (ад 16 да 30 гадоў) з 12 краін: Беларусі, Грузіі, Кітая, Карэі, Латвіі, Літвы, Малдовы, Расіі, Узбекістана, Украіны, Эстоніі, Японіі. У склад міжнароднага журы ўваходзілі вядомыя педагогі і музычныя дзеячы – Дж. Марыёці (Італія), К. Гержод (Польшча), Дж. Бановец (ЗША), К. Колева (Францыя), А. Зандманіс (Латвія), В. Рахленка, 3. Качарская і Ю. Гільдзюк (Беларусь). Узначальвалі журы (сустаршыні) В. Мяржанаў (Расія) і I. Алоўнікаў (Беларусь).

На працягу 13 дзён (31 кастрычніка – 2 лістапада) увага мінскай публікі – педагогаў, студэнтаў, навучэнцаў, аматараў музыкі, а таксама шматлікіх гасцей, якія спецыяльна прыехалі з гарадоў Беларусі і блізкага замежжа, – была прыкавана да конкурсных праслухоўванняў. Канцэртная зала Беларускай дзяржаўнай філармоніі на працягу ўсіх трох тураў была поўная. Спецыялісты, слухачы і самі ўдзельнікі адзначылі высокі прафесійны ўзровень канкурсантаў і добразычлівую творчую атмасферу, створаную арганізатарамі конкурсу.

Прызавыя месцы размеркаваліся наступным чынам:

• I прэмія– Андрэй Сікорскі (Расія);
• II прэмія– Іосіф Сяргей (Беларусь);
• III прэмія– Тамара Санікідзэ (Грузія).

Дыпламантамі конкурсу сталі Андрэй Шабала (Украіна), Сяргей Смірноў і Вадзім Гацко (Беларусь).

Праз чатыры гады ў Міжнародным конкурсе "Мінск-2000" (5 красавіка – 19 красавіка) прынялі ўдзел 85 выканаўцаў з 15 краін: Арменіі, Беларусі, Вялікабрытаніі, Германіі, Даніі, Ізраіля, Казахстана, Кітая, Кыргызстана, Расіі, Тайваня, Украіны, Францыі, Эстоніі, Японіі. У склад міжнароднага журы ўваходзілі Д. Полак (ЗША), А. Вардзі (Ізраіль), М. Лукашчык (Польшча), М. Аўчыннікаў (Расія), У. Казлоў (Украіна), Ю. Гільдзюк, У. Рахленка, У. Шацкі, Л. Шаламенцава (Беларусь). Узначальваў журы I. Алоўнікаў (Беларусь).

Прызавыя месцы размеркаваліся наступным чынам:

• I прэмія– Аляксандр Музыкантаў (Беларусь);
• II прэмія– Іна Салдаценка (Украіна);
• III прэмія– Заруi Амбарцумян (Расія).

Дыпламантамі конкурсу сталі Таццяна Цітова (Расія), Канстанцін Красніцкі і Сяргей Смірноў (Беларусь).

Праз 5 гадоў, у 2005 годзе (2 – 17 снежня) адбыўся Міжнародны конкурс піяністаў "Мінск-2005", на ўдзел у якім была пададзена 81 заяўка з 17 краін – Арменіі, Беларусі, Ізраіля, Казахстана, Кыргызстана, Латвіі, Літвы, Польшчы, Расіі, Сербіі і Чарнагорыі, Туркменістана, Узбекістана, Украіны, Фінляндыі, Чэхіі, Эстоніі, Японіі. У склад міжнароднага журы, старшынёй якога быў I. Алоўнікаў (Беларусь), уваходзілі А. Зандманіс (Латвія), В. Рачкевіч (Польшча), А. Севідаў (Расія), У. Казлоў (Украіна), Ю. Гільдзюк, У. Нехаенка, У. Шацкі, Л. Шаламенцава (Беларусь).

Першыя прэміі і званні лаўрэатаў былі прысуджаны Аляксею Чарнаву (Расія) і Цімуру Шчарбакову (Беларусь). Дыпломы і званні дыпламантаў конкурсу атрымалі чатыры піяніста з Беларусі - Канстанцін Красніцкі, Васіль Нетук, Віталь Стахіевіч і Улада Шацкая.

Яшчэ праз пяць гадоў адбыўся Міжнародны конкурс піяністаў "Мінск-2010" (25 лістапада – 9 снежня), на ўдзел у якім было пададзена 87 заявак з 10 краін: Арменіі, Беларусі, Грузіі, Казахстана, Кітая, Латвіі, Малдовы, Расіі, Украіны, Японіі. У склад міжнароднага журы ўвайшлі Ж. Аубакiрава (Казахстан), I. Берковiч (Ізраіль), А. Дзiеў (Расія), А. Зандманiс (Латвія), У. Казлоў (Украіна), П. Лассман (Эстонія), а. Палета-Бугай (Польшча), Ю. Гiльдзюк, У. Няхаенка, С. Мікулік, У. Шацкі, Л. Шаламенцава (Беларусь). Па традыцыі, узначаліў журы I. Алоўнікаў (Беларусь).

Прызавыя месцы размеркаваліся наступным чынам:

• I прэміяне прысуджана;
• II прэмія– Аляксандр Панфілаў (Расія) і Аляксандр Самойлаў (Украіна);
• III прэмія– Фаціма Мерданава (Расія) і Улада Шацкая (Беларусь).

Дыпломы і званні дыпламантаў конкурсу былі зноў прысвоены ўдзельнікам з Беларусі - Яўгену Галанаву і Паўлу Нетуку.

У 2014 годзе адбыўся Міжнародны конкурс піяністаў "Мінск-2014", удзел у якім прынялі 50 выканаўцаў з 10 краін: Азербайджана, Беларусі, Бельгіі, Кітая, Латвіі, Марока, Малдовы, Расіі, Украіны, Францыі. У склад журы пад старшынствам I. Алоўнікава (Беларусь) уваходзілі А. Нерсесян (Арменія), С. Асакін (Латвія), М. Рубацкітэ (Літва), Н. Труль, В. Шкарупа (Расія), Ю. Гільдзюк, У. Дулаў (Беларусь).

Прызавыя месцы размеркаваліся наступным чынам:

• I прэмія– Андрэй Іваноў (Беларусь);
• II прэмія– Аляксандр Данілаў (Беларусь) і Раман Касякоў (Расія);
• III прэмія– Ганна Грот (Расія).

Заахвочвальных прэмій і званняў дыпламантаў былі ўдастоены Віталь Старыкаў (Расія) і Анатоль Касцючэнка (Украіна).

Пасля сямігадовага перапынку адбыўся Міжнародны конкурс піяністаў "Мінск-2021", на ўдзел у якім была пададзена 51 заяўка з сямі краін: Беларусі, Расіі, Кітая, Казахстана, Узбекістана, Арменіі, Украіны.

Конкурсныя праслухоўванні праходзілі на дзвюх сцэнічных пляцоўках: адборачныя туры - у Вялікай зале Беларускай дзяржаўнай акадэміі музыкі, фінал - у Вялікай канцэртнай зале Беларускай дзяржаўнай філармоніі.

Нягледзячы на складаную эпідэміялагічную абстаноўку ў свеце, конкурсу ўдалося аб'яднаць у сабе мноства ўдзельнікаў і велізарную аўдыторыю слухачоў, бо ўпершыню за гісторыю конкурсу вялася прамая трансляцыя выступленняў.

У склад міжнароднага журы, нязменным старшынёй якога стаў I. Алоўнікаў (Беларусь), увайшлі М. Абрамян (Арменія), С. Асабаева (Казахстан), А. Лапікус (Малдова), М. Файзіева (Узбекістан), В. Шкарупа (Расія), Ю. Гільдзюк, У. Дулаў, С. Мікулік (Беларусь).

Прызавыя месцы размеркаваліся наступным чынам:

• I прэмія– Арсеній Мярзлоў (Расія);
• II прэмія– Мікіта Сцяцэнка (Узбекістан);
• III прэмія– Уладзіслаў Хандогi (Беларусь), Валянцін Малінін (Расія).

Дыпламантамі конкурсу сталі Алена Навуменка (Беларусь) і Зарына Акаева (Казахстан).

Вынікі міжнародных піяністычных конкурсаў у Мінску дазволілі гаварыць аб сур'ёзным поспеху беларускай фартэпіяннай школы, дасягненні якой у апошнія гады шматкроць пацвярджаліся на розных конкурсах свету. Правядзенне ў сталіцы Рэспублікі Беларусь Міжнароднага конкурсу піяністаў уключыла горад Мінск у музычную геаграфію сусветнага конкурснага руху.