Гісторыя міжнародных піяністычных конкурсаў у Беларусі пачынаецца з 1996 года. Першы Міжнародны конкурс музыкантаў-выканаўцаў “Фартэпіяна. Мінск–96” адбыўся восенню 1996 года па пастанове Міністэрства культуры Рэспублікі Беларусь і пры спрыянні спецыяльнага фонду Прэзідэнта Рэспублікі Беларусь па падтрымцы таленавітай моладзі. У конкурсе ўзялі ўдзел 82 маладыя піяністы (ад 16 да 30 гадоў) з 12 краін: Беларусі, Грузіі, Кітая, Карэі, Латвіі, Літвы, Малдовы, Расіі, Узбекістана, Украіны, Эстоніі, Японіі. У склад міжнароднага журы ўваходзілі вядомыя педагогі і музычныя дзеячы – Дж.Марыёці (Італія), К.Гержод (Польшча), Дж.Банавец (ЗША), К.Колева (Францыя), А.Зандманіс (Латвія), В.Рахленка, 3.Качарская і Ю.Гільдзюк (Беларусь). Узначальвалі журы (сустаршыні) В.Мяржанаў (Расія) і І.Алоўнікаў (Беларусь).

На працягу 13 дзён (31 кастрычніка – 2 лістапада) увага мінскай публікі – педагогаў, студэнтаў, навучэнцаў, аматараў музыкі, а таксама шматлікіх гасцей, якія спецыяльна прыехалі з гарадоў Беларусі і блізкага замежжа, – была сфакусавана на конкурсных праслухоўваннях. Канцэртная зала Беларускай дзяржаўнай філармоніі на працягу ўсіх трох тураў была поўная. Спецыялісты, слухачы і самі ўдзельнікі адзначылі высокі прафесійны ўзровень канкурсантаў і зычлівую творчую атмасферу, створаную арганізатарамі конкурсу.

Прызавыя месцы размеркаваліся наступным чынам:

• I прэмія – Андрэй Сікорскі (Расія);
• II прэмія – Іосіф Сяргей (Беларусь);
• III прэмія – Тамара Санікідзэ (Грузія).

Дыпламантамі конкурсу сталі Андрэй Шабала (Украіна), Сяргей Я. Смірноў і Вадзім Гацко (Беларусь).

Праз чатыры гады ў Міжнародным конкурсе “Мінск–2000” (5 красавіка – 19 красавіка) узялі ўдзел 85 выканаўцаў з 15 краін: Арменіі, Беларусі, Вялікабрытаніі, Германіі, Даніі, Ізраіля, Казахстана, Кітая, Кыргызстана, Расіі, Тайваня, Украіны, Францыі, Эстоніі, Японіі. У склад міжнароднага журы ўваходзілі Д.Полак (ЗША), А.Вардзі (Ізраіль), М.Лукашчык (Польшча), М.Аўчыннікаў (Расія), В.Казлоў (Украіна), Ю.Гільдзюк, В.Рахленка, В.Шацкі, Л.Шаламенцава (Беларусь). Узначальваў журы І.Алоўнікаў (Беларусь).

Прызавыя месцы размеркаваліся наступным чынам:

• I прэмія – Аляксандр Музыкантаў (Беларусь);
• II прэмія – Іна Салдаценка (Украіна);
• III прэмія – Заруі Амбарцумян (Расія).

Дыпламантамі конкурсу сталі Таццяна Цітова (Расія), Канстанцін Красніцкі і Сяргей Я. Смірноў (Беларусь).

Праз 5 гадоў, у 2005 годзе (2–17 снежня) адбыўся Міжнародны конкурс піяністаў “Мінск–2005”, на ўдзел у якім была пададзена 81 заяўка з 17 краін: Арменіі, Беларусі, Ізраіля, Казахстана, Кыргызстана, Латвіі, Літвы, Польшчы, Расіі, Сербіі і Чарнагорыі, Туркменістана, Узбекістана, Украіны, Фінляндыі, Чэхіі, Эстоніі, Японіі. У склад міжнароднага журы, старшынём якога быў І.Алоўнікаў (Беларусь), уваходзілі А.Зандманіс (Латвія), В.Рачкевіч (Польшча), А.Сявідаў (Расія), В.Казлоў (Украіна), Ю.Гільдзюк, У.Няхаенка, В.Шацкі, Л.Шаламенцава (Беларусь).

Першыя прэміі і званні лаўрэатаў былі прысуджаны Аляксею Чарнову (Расія) і Цімуру Шчарбакову (Беларусь). Дыпломы і званні дыпламантаў конкурсу атрымалі чатыры піяністы з Беларусі – Канстанцін Красніцкі, Васіль Нетук, Віталь Стахіевіч і Улада Шацкая.

Яшчэ праз пяць гадоў адбыўся Міжнародны конкурс піяністаў “Мінск–2010” (25 лістапада – 9 снежня), на ўдзел у якім была пададзена 87 заявак з 10 краін: Арменіі, Беларусі, Грузіі, Казахстана, Кітая, Латвіі, Малдовы, Расіі, Украіны, Японіі. У склад міжнароднага журы ўвайшлі Ж.Аўбакірава (Казахстан), І.Беркавіч (Ізраіль), А.Дзіеў (Расія), А.Зандманіс (Латвія), В.Казлоў (Украіна), П.Ласман (Эстонія), А.Палета-Бугай (Польшча), Ю.Гільдзюк, У.Няхаенка, С.Мікулік, В.Шацкі, Л.Шаламенцава (Беларусь). Па традыцыі, узначаліў журы І.Алоўнікаў (Беларусь).

Прызавыя месцы размеркаваліся наступным чынам:

• I прэмія не прысуджана;
• II прэмія – Аляксандр Панфілаў (Расія) і Аляксандр Самойлаў (Украіна);
• III прэмія – Фаціма Мярданава (Расія) і Улада Шацкая (Беларусь).

Дыпломы і званні дыпламантаў конкурсу былі зноў прысвоены ўдзельнікам з Беларусі – Яўгену Галанаву і Паўлу Нетуку.

І, нарэшце, у 2014 годзе адбыўся Міжнародны конкурс піяністаў “Мінск–2014”, удзел у якім узялі 50 выканаўцаў з 10 краін: Азербайджана, Беларусі, Бельгіі, Кітая, Латвіі, Марока, Малдовы, Расіі, Украіны, Францыі. У склад журы пад старшынствам І.Алоўнікава (Беларусь) уваходзілі А.Нерсясян (Арменія), С.Асокін (Латвія), М.Рубацкітэ (Літва), Н.Труль, В.Шкарупа (Расія), Ю.Гільдзюк, У.Дулаў (Беларусь).

Прызавыя месцы размеркаваліся наступным чынам:

• I прэмія – Андрэй Іваноў (Беларусь);
• II прэмія – Аляксандр Данілаў (Беларусь) і Раман Касякоў (Расія);
• III прэмія – Ганна Грот (Расія).

Заахвочвальныя прэміі і званні дыпламантаў атрымалі Віталь Старыкаў (Расія) і Анатоль Касцючэнка (Украіна).

Вынікі міжнародных піяністычных конкурсаў у Мінску дазволілі казаць пра сур’ёзны поспех беларускай фартэпіяннай школы, дасягненні якой у апошнія гады шматразова пацвярджаліся на розных конкурсах свету. Правядзенне ў сталіцы Рэспублікі Беларусь міжнароднага конкурсу піяністаў уключыла горад Мінск у музычную геаграфію сусветнага конкурснага руху.